主将缺阵战力减 博祖记咬唔入富咸

欧霸盃16强首回合其中一场重量级赛事，由老牌意甲劲旅祖云达斯主场迎战富咸，力奇睇好富咸有力保住不败开出让球客胜。近况反覆祖记今仗会有4大主力阿马利、保方、菲腊比美路同基亚连尼缺阵，战斗力大减，加上佢主帅沙哲朗尼撞亲英超球队都冇运行，今仗仲点赢已经9场不败富咸？（有线61周五凌晨4:05直播）

上周日意甲作客2:1砌低费伦天拿的祖记，紧今仗肯定会惹人憧景，不过咪话力奇唔提你，佢赢费伦其实都算几好彩，首个入波迪亚高被指有越位之嫌，到致胜一球都只系由后格罗素取得，如果计埋前3场分别对巴勒莫、阿积士同博洛尼亚，斑马军团条前锋线已经连续4场未入过波，你都咪话唔得人惊！

斑马兵锋将4场冇波入

更加令人担心系，祖记上仗有后防重心基亚连尼受伤，中场菲腊比美路又话今仗要停赛，射手阿马利又养紧伤，要知道佢个巴西发电机迪亚高近排已经系带伤上阵，战斗力七除八扣之下仲有几多？你估真系主场大晒，话赢就赢羊！

富咸方面，今仗会有过千球迷随队出征都灵，球员点会唔搏命？再者，呢班波近况真系唔错，已经连续9场未输过，领队鹤臣同门将舒华沙仲分别荣膺二月份英超最佳领队同球员，士气的确一流！虽然话富咸今仗会有中场梅菲停赛，但查实佢今届欧霸6场作客波只系输过2场，战绩唔差。反而睇番数据，祖记新帅沙哲朗尼以往无论系带领AC定国米，夹埋5次遇上英超球队，竟然系录得3和2负战绩，莫非系佢战术打法畀英超球队食到正？